Thirrje e hapur për aplikim për “Koordinator për mentorimin dhe mbështetjen e shkollave”

Datë: 20/07/2026

THIRRJE E HAPUR PËR APLIKIM

Dy pozicione: Koordinator për Mentorimin dhe Mbështetjen e Shkollave

Qendra për Aftësi Konkurruese – Center for Competitive Skills (CCS), në kuadër të zbatimit të një projekti të mbështetur nga Bashkimi Evropian dhe UNICEF-i, shpall thirrjen e hapur për përzgjedhjen e: dy Koordinatorëve për Mentorimin dhe Mbështetjen e Shkollave

Koordinatorët do të mbështesin zbatimin e aktiviteteve të projektit në shkollat dhe bashkitë e përfshira, duke siguruar koordinimin e vazhdueshëm ndërmjet ekipit të projektit, shkollave, mësuesve, mentorëve, strukturave vendore të arsimit dhe komuniteteve.

Njëri Koordinator do të mbulojë kryesisht shkollat dhe bashkitë e grupuara në zonën veriore, ndërsa Koordinatori tjetër do të mbulojë kryesisht zonën jugore. Pozicionet janë të vendosura pranë zyrës së CCS-së në Tiranë dhe përfshijnë udhëtime të rregullta në shkollat dhe bashkitë e projektit.

Detyrat kryesore

Koordinatorët do të jenë përgjegjës për:

• hartimin dhe përditësimin e planeve të punës dhe kalendarëve të aktiviteteve;
• koordinimin me shkollat, mësuesit, mentorët, institucionet vendore dhe ekipin e projektit;
• mbështetjen e organizimit të trajnimeve, workshop-eve, sesioneve të mentorimit dhe vizitave monitoruese;
• ofrimin e mbështetjes së vazhdueshme për mësuesit dhe edukatorët;
• monitorimin e cilësisë dhe ecurisë së aktiviteteve në shkolla;
• mbledhjen, verifikimin dhe sistemimin e të dhënave dhe dokumentacionit të projektit;
• përgatitjen e raporteve periodike mbi progresin, rezultatet, problematikat dhe rekomandimet;
• mbështetjen e aktiviteteve me nxënës, prindër, komunitete dhe përfaqësues të sektorit privat;
• identifikimin dhe dokumentimin e historive të suksesit, praktikave të mira dhe mësimeve të nxjerra;
• lehtësimin e shkëmbimit të eksperiencave dhe të nxënit mes kolegëve ndërmjet shkollave.

Detyrat e detajuara të pozicionit përcaktohen në Termat e Referencës të miratuara nga CCS-ja.

Kriteret e kërkuara

Kandidatët duhet të plotësojnë kriteret e mëposhtme:

• diplomë universitare, të paktën në nivelin Bachelor, në shkenca sociale, edukim, menaxhim, administrim publik, ekonomi, komunikim, zhvillim komunitar ose fusha të ngjashme;
• të paktën 3 vjet eksperiencë profesionale relevante;
• eksperiencë në koordinimin ose zbatimin e projekteve në fushën e arsimit, aftësive për jetën, orientimit për karrierën, zhvillimit të të rinjve, përfshirjes sociale ose zhvillimit komunitar;
• eksperiencë në bashkëpunimin me shkolla, mësues, institucione publike, organizata jofitimprurëse ose komunitete vendore;
• aftësi të mira organizative, planifikuese, koordinuese dhe raportuese;
• njohuri shumë të mira të gjuhës shqipe dhe njohuri të mira të gjuhës angleze;
• njohuri të mira të paketës Microsoft Office dhe mjeteve të komunikimit online;
• gatishmëri për udhëtime të rregullta në bashkitë dhe shkollat e projektit;
• integritet profesional, paanshmëri dhe përkushtim ndaj parimeve të mbrojtjes së fëmijëve dhe mosdiskriminimit.

Kriteret e plota të kualifikimit paraqiten në dokumentacionin e procedurës.

Dokumentacioni i aplikimit

Kandidatët e interesuar duhet të paraqesin:

• CV të përditësuar;
• letër motivimi;
• dokumente të tjera mbështetëse që dëshmojnë kualifikimet dhe eksperiencën profesionale.

Në letrën e motivimit, kandidatët mund të shprehin preferencën për mbulimin e grupit verior ose jugor. Preferenca nuk përbën garanci për caktimin përfundimtar territorial.

Kandidatët e përzgjedhur në listën e shkurtër ose të rekomanduar për kontraktim mund të kërkohen të paraqesin dokumentacion shtesë për verifikimin e arsimit, eksperiencës profesionale dhe referencave.

Përpara nënshkrimit të kontratës, kandidatët fitues do të nënshkruajnë deklaratën e Kodit të Sjelljes dhe dokumentet përkatëse për mbrojtjen e fëmijëve, si dhe do t’i nënshtrohen verifikimit të referencave dhe dokumentacionit të paraqitur.

Mënyra dhe afati i aplikimit

Aplikimet duhet të dërgohen deri më: 27 korrik 2026, ora 17:00, në adresën elektronike: info@competitiveskills.org me subjekt: “Aplikim – Koordinator për Mentorimin dhe Mbështetjen e Shkollave”

Aplikimi mund të dorëzohet edhe fizikisht në adresën:

Qendra për Aftësi Konkurruese
Rruga “Shyqyri Bërxolli”, Pallati Aurora, Kati 7, Ap. 28
Tiranë, Shqipëri

Aplikimet e dorëzuara pas përfundimit të afatit mund të mos merren në konsideratë. Vetëm kandidatët e përzgjedhur në listën e shkurtër do të kontaktohen për intervistë.

Procedura është e hapur për kandidatë të brendshëm dhe të jashtëm, të cilët do të vlerësohen në mënyrë të barabartë, transparente dhe konkurruese.

Për informacion të plotë mbi detyrat, kriteret e kualifikimit, dokumentacionin dhe procedurën e aplikimit, ju lutemi konsultoni Termat e Referencës bashkëngjitur këtij njoftimi.