Projekti zbatohet nga UNICEF Albania, në partneritet me Qendrën për Aftësi Konkurruese (CCS), dhe ka në fokus forcimin e kapaciteteve të shkollave, mësuesve, drejtuesve dhe koordinatorëve të karrierës për të ofruar një qasje më të strukturuar, gjithëpërfshirëse dhe praktike ndaj zhvillimit të aftësive të nxënësve. Projekti ka kohëzgjatje 18 muaj dhe fokusohet në 30 shkolla të mesme të larta në bashki të përzgjedhura në Shqipëri.

Në qendër të projektit janë aftësitë e shekullit XXI, si mendimi kritik, komunikimi, bashkëpunimi, kreativiteti dhe aftësitë digjitale, të cilat janë thelbësore për përgatitjen e të rinjve për jetën, arsimin e mëtejshëm dhe tregun e punës. Projekti synon që këto aftësi të integrohen në mënyrë më të qëndrueshme në procesin mësimor, përmes moduleve digjitale, materialeve mbështetëse dhe trajnimit të mësuesve.

Një komponent i rëndësishëm i projektit është zhvillimi dhe zbatimi i një modeli të orientimit për karrierë në shkolla. Ky model do të ndihmojë nxënësit të njohin më mirë aftësitë, interesat dhe mundësitë e tyre, si dhe të marrin vendime më të informuara për rrugëtimin arsimor dhe profesional. Projekti do të nxisë gjithashtu lidhje më të forta midis shkollave, zyrave të punësimit, institucioneve të arsimit të lartë, bizneseve dhe komunitetit lokal.

Përmes ndërhyrjeve të tij, projekti do të mbështesë:

• zhvillimin e moduleve digjitale për aftësitë për jetën;
• trajnimin e mësuesve, drejtuesve të shkollave dhe koordinatorëve të karrierës;
• ngritjen dhe forcimin e rrjeteve të mësuesve dhe koordinatorëve të karrierës;
• zhvillimin e një modeli të strukturuar për orientimin për karrierë;
• organizimin e aktiviteteve ndërgjegjësuese dhe bashkëpunuese me aktorë të tregut të punës;
• pajisjen e shkollave të përzgjedhura me paketa teknologjike për të mbështetur mësimdhënien dhe orientimin digjital.

Projekti vendos theks të veçantë te përfshirja, barazia dhe qasja pa paragjykime në informacionin për karrierën. Ai synon të mbështesë të gjithë nxënësit, përfshirë ata që vijnë nga zona më të vogla, komunitete me më pak mundësi apo grupe më të cenueshme, duke u krijuar akses më të mirë në aftësi, informacion dhe mundësi zhvillimi.

Në nivel më të gjerë, projekti kontribuon në modernizimin e arsimit parauniversitar në Shqipëri dhe në përafrimin e tij me prioritetet e integrimit evropian, veçanërisht në fushën e arsimit, aftësive, punësimit dhe zhvillimit të kapitalit njerëzor.

Periudha e zbatimit: dhjetor 2025 – korrik 2026

Rajonet: Tirane, Vlore, Sarande, Shkoder, Durres, Elbasan, Berat

Në kuadër të përpjekjeve të vazhdueshme për të përmirësuar cilësinë dhe qëndrueshmërinë e arsimit dhe formimit profesional dual (AFP), projekti është duke zhvilluar dhe zbatuar një sistem të plotë për trajnimin, certifikimin dhe mbështetjen e mentorëve në kompani.

Një program kombëtar i standardizuar trajnimi është duke u hartuar për të pajisur mentorët me aftësitë e nevojshme për të udhëhequr dhe mbështetur praktikantët në mjediset reale të punës. Ky program do të shoqërohet me një manual dhe toolbox praktik për mentorët, që do të ofrojnë udhëzime të qarta për punën e përditshme dhe do të sigurojnë një qasje të unifikuar në të gjitha sektorët.

Për të garantuar cilësinë dhe njohjen formale të rolit të mentorit, janë duke u zhvilluar procedura të standardizuara për vlerësimin dhe certifikimin e tyre. Projekti synon të trajnojë dhe certifikojë 200–300 mentorë në kompani, duke siguruar që programet e AFP dual të mbështeten nga profesionistë të kualifikuar në vendin e punës.

Në të njëjtën kohë, projekti po punon për ndërtimin e një sistemi të qëndrueshëm përmes vlerësimit të kapaciteteve ekzistuese të institucioneve të AFP-së, si dhe hartimit të një manuali të zinxhirit të zbatimit dhe një plani për zhvillimin e kapaciteteve në nivel kombëtar. Këto instrumente do të përcaktojnë qartë rolet dhe përgjegjësitë e aktorëve kryesorë dhe do të mundësojnë institucionalizimin dhe shtrirjen e trajnimit të mentorëve në shkallë kombëtare.

Gjithashtu, po zhvillohet një program trajnimi për trajnerë (ToT), me synimin për të krijuar një grup prej rreth 100 profesionistësh të trajnuar, përfshirë trajnerë, master-trajnerë dhe staf administrativ, të cilët do të mbështesin zbatimin dhe qëndrueshmërinë afatgjatë të sistemit.

Në tërësi, projekti pritet të vendosë bazat për një qasje më të strukturuar, të koordinuar dhe të qëndrueshme ndaj mentorimit në kompani brenda sistemit të AFP dual, duke kontribuar në rritjen e cilësisë së formimit profesional dhe në përafrimin më të mirë me kërkesat e tregut të punës.

Në fazën e dytë të projektit, Sistemi i Paralajmërimit të Hershëm (SPH) dhe programet e të Nxënit Socio-Emocional (SEL) do të vijojnë të zbatohen në 12 shkolla të arsimit profesional në rajonet e Tiranës, Vlorës dhe Shkodrës në Shqipëri. Kjo fazë ka për qëllim të konsolidojë dhe zgjerojë rezultatet e arritura në fazën e parë, duke reduktuar në mënyrë të qëndrueshme normat e braktisjes dhe duke adresuar sfidat që lidhen me të rinjtë jashtë arsimit, punësimit dhe trajnimit (NEET).

Projekti do të përqendrohet në zhvillimin e kapaciteteve të stafit pedagogjik dhe strukturave mbështetëse përmes trajnimeve të avancuara dhe mentorimit të vazhdueshëm mbi zbatimin e SPH dhe SEL. Synohet trajnimi i 250 mësuesve dhe punonjësve arsimorë dhe vijimi i punës së bashku për të krijuar strategji gjithëpërfshirëse për mbështetjen e nxënësve në rrezik, si dhe për të hartuar plane individuale të parandalimit të braktisjes.

Një tjetër fokus i fazës së dytë është fuqizimi i pronësisë institucionale dhe qëndrueshmërisë së ndërhyrjeve përmes dhënies së granteve të vogla për shkollat, për zbatimin e projekteve komunitare të parandalimit të braktisjes, të bazuara në nevojat dhe idetë e komunitetit shkollor.

Implementimi i Sistemit të Paralajmërimit të Hershëm dhe i programeve të të Nxënit Socio-Emocional fuqizon kapacitetet e shkollave për të identifikuar dhe mbështetur nxënësit në rrezik, duke krijuar një mjedis mësimor më gjithëpërfshirës dhe mbështetës. Kjo ndërhyrje i përgjigjet nevojës për një arsimit profesional më të qëndrueshëm, të lidhur ngushtë me nevojat e tregut dhe shoqërisë.

Ky projekt realizohet në bashkëpunim të ngushtë me aktorë kyç institucionalë, si Agjencia Kombëtare e Arsimit Profesional (AKPA) dhe AKAFPK.

Rezultatet e pritshme:

• Trajnimi dhe mentorimi i mbi 250 punonjësve arsimorë për SPH dhe SEL
• Zhvillimi i planeve individuale të parandalimit të braktisjes për nxënësit në rrezik
• Zbatimi i strategjive gjithëpërfshirëse për mbështetjen e nxënësve në risk
• Integrimi i SPH në vetëvlerësimin dhe procesin e akreditimit të shkollave
• Fuqizimi i bashkëpunimit institucional me AKPA, AKAFPK dhe aktorë të tjerë
• Dhënia e granteve të vogla për shkollat për zbatim projektesh komunitare

Përfituesit:

• +250 punonjës arsimorë të trajnuar dhe mentoruar (mësues të lëndëve të përgjithshme dhe profesionale, psikologë, punonjës socialë, drejtues shkollash)
• Nxënës të shkollave profesionale në rrezik braktisjeje, të përfshirë në plane individuale dhe aktivitete mbështetëse
• Institucione publike (AKPA, AKAFPK) me kapacitete të forcuara për integrimin e SPH/SEL në sistem

Dokumentet të krijuara,  mbi të cilat do të mbështetet projekti:

• Kurrikula të trajnimeve për SPH dhe SEL
• Manuali i trajnimit dhe zbatimit të sistemit
• Instrumente për vetë-monitorim dhe vlerësim të cilësisë së zbatimit në shkolla
• Paketa model për projekte shkollore me fokus SPH dhe SEL
• Mekanizmi financiar për shpërndarjen e granteve të vogla

Arritje të parashikuara:

• Zhvillimi i një modeli funksional dhe të transferueshëm për zbatimin e SPH dhe SEL në arsimin profesional
• Krijimi i strukturave të qëndrueshme brenda shkollave për të identifikuar dhe mbështetur nxënësit në rrezik largimi
• Rritja e frekuentimit dhe përmirësimi i mirëqenies emocionale dhe akademike tek të rinjtë në shkollat profesionale
• Zhvillimi i bashkëpunimit institucional me qasje të koordinuar mes shkollave dhe autoriteteve kombëtare të arsimit professional

Trajnimi përfshin zhvillimin e një qasjeje praktike dhe të zbatueshme për përgatitjen dhe vlerësimin e mentorëve, formimin hyrës të 15 mësuesve të AFP-së si instruktorë kryesorë, si dhe certifikimin e 40 mentorëve nga kompanitë pjesëmarrëse. Kjo ndërhyrje synon të kontribuojë në ndërtimin e një modeli kombëtar të trajnimit të mentorëve në ndërmarrje, si pjesë integrale e AFP-së duale në Shqipëri.

Përgatitja e mentorëve në ndërmarrje për AFP-në duale në Shqipëri, e zbatuar nga Qendra për Aftësi Konkurruese, mbështetet nga Fondi për Sfida Rajonale, një instrument i Forumit të Investimeve të Dhomave të Ballkanit Perëndimor 6 (WB6-CIF), me qëllim nxitjen e bashkëpunimit midis sistemit të arsimit profesional dhe sektorit privat në rajon.

Periudha: Mars – Prill 2025.

Qëllimi i këtij programi është të forcojë komponentin e të nxënit në vendin e punës në arsimin profesional dual, përmes trajnimit dhe certifikimit të mentorëve në ndërmarrje dhe ndërtimit të një modeli të qëndrueshëm trajnimi të bazuar në bashkëpunimin mes arsimit dhe biznesit.

Rezultatet e pritshme të trajnimit janë:

• Zhvillimi i një qasjeje pragmatike dhe të thjeshtë për trajnimin dhe vlerësimin e mentorëve në ndërmarrje, që përfshin modulet dhe rezultatet e të nxënit të përcaktuara në kurrikulën zyrtare të dhjetorit 2024 (Kodi: PK-Y-3-24);
• Formimi i një ekipi prej 15 mësuesish të AFP-së si trajnerë të mentorëve, të cilët do të jenë të aftë të zhvillojnë dhe zgjerojnë më tej trajnimin e mentorëve në ndërmarrje;
• Trajnimi dhe certifikimi i 40 mentorëve të kualifikuar në ndërmarrje, të përzgjedhur nga kompanitë partnere, të cilët do të mbështesin procesin e të nxënit në vendin e punës në kuadër të pilotimit të AFP-së duale për vitin akademik 2024/2025;
• Përmbledhja dhe dokumentimi i mësimeve të nxjerra nga implementimi i masës së trajnimit, duke ofruar rekomandime konkrete për përmirësimin dhe zgjerimin e modelit të trajnimit të mentorëve, në mënyrë që ky model të integrohet si pjesë thelbësore e sistemit kombëtar të AFP-së duale në Shqipëri.

Pse është i rëndësishëm ky projekt?

Ky projekt ka rëndësi të veçantë për përmirësimin e lidhjes midis arsimit profesional dhe nevojave reale të tregut të punës në Shqipëri. Duke trajnuar dhe certifikuar mentorët në ndërmarrje, ai forcon elementin praktik të arsimit dual, duke ndihmuar të rinjtë të fitojnë aftësi të kërkuara dhe përvojë reale pune. Përmes kësaj iniciative, krijohen mundësi më të mëdha për punësim të qëndrueshëm dhe për zhvillimin e kapaciteteve të ndërmarrjeve dhe institucioneve arsimore, duke kontribuar në zhvillimin ekonomik dhe social të vendit.

Bazat për Sukses: Fuqizimi i të rriturve përmes aftësive bazë zbatuar nga Qendra për Aftësi Konkurruese në bashkëpunim me Bashkinë Tiranë është në kuadër të projektit BE për Përfshirjen në Tregun e Punës financuar nga Bashkimi Evropian dhe që zbatohet nga PNUD Shqipëri, Zyra Publike Suedeze e Punësimit dhe Fondacioni Shqiptar për të Drejtat e Personave me Aftësi të Kufizuara (FSHDPAK) në partneritet me Agjencinë Kombëtare të Punësimit dhe Aftësive.

Qëllimi i projektit

Të fuqizojë individët që përballen me vështirësi për të hyrë në tregun e punës, duke u ofruar atyre trajnime të përshtatura për zhvillimin e aftësive bazë dhe mbështetje për përfshirje të mëtejshme në arsim, formim profesional dhe punësim.

Periudha: Mars 2025 – Maj 2026 (15 muaj)

Grupet që përfitojnë nga projekti

• Të rinjtë NEET (15-29 vjeç, që nuk janë të punësuar, nuk ndjekin shkollë apo trajnim): 115 persona (80 në Tiranë dhe 35 në Shkodër)
• Nënat e reja të papuna: 20 persona (14 në Tiranë dhe 6 në Shkodër)
• Përfituesit e ndihmës ekonomike: 60 persona (42 në Tiranë de 18 në Shkodër)
• Personat me aftësi të kufizuara (PAK): 5 persona (4 në Tiranë dhe 1 në Shkodër)

Numri i përfituesve: 200 persona (140 në Tiranë dhe 60 në Shkodër)

Çfarë ofron projekti?

• Trajnime në aftësi bazë të shkrim-leximit, matematikë dhe aftësi digjitale
• Mbështetje psiko-sociale dhe këshillim individual
• Punëtori për zhvillimin e aftësive të buta (soft skills)
• Orientim në karrierë dhe ndihmë për regjistrim në arsimin me kohë të pjesshme dhe kalimin në tregun e punës

Rezultatet e pritshme

• 200 përfitues do të marrin mbështetje psiko-sociale dhe orientim në karrierë, prej të cilëve 140 në Tiranë dhe 60 në Shkodër
• 200 përfitues do të përfundojnë trajnimin në aftësi bazë (140 në Tiranë dhe 60 në Shkodër)
• Do të përgatitet një model kombëtar që mund të përsëritet në qytete të tjera të Shqipërisë
• Do të nxitet regjistrimi në arsimin bazë me kohë të pjesshme për ata që kanë potencial të vazhdojnë shkollimin
• Pjesëmarrësit pritet të angazhohen në trajnim profesional ose të hyjnë në tregun e punës brenda 6 muajve pas përfundimit të programit, si rezultat i përmirësimit të aftësive dhe vetëbesimit të fituar gjatë projektit

Pse është i rëndësishëm ky projekt?

Shqipëria po përballet me një nivel të lartë të të rinjve jashtë arsimit dhe punës. Ky projekt adreson drejtpërdrejt mungesën e aftësive bazë, vetëbesimit dhe orientimit për një të ardhme më të sigurt profesionale. Ai gjithashtu krijon ura bashkëpunimi ndërmjet institucioneve lokale dhe qendrore, me qëllim ndërtimin e një modeli të qëndrueshëm dhe të përshtatshëm për komunitetet në nevojë.

Si do të realizohet?

Zbatimi i projektit do të zhvillohet në tre cikle trajnimi, secili me kohëzgjatje tre-katër muaj. Pjesëmarrësit do të ndahen në grupe të vogla prej 10-14 personash (rreth 6 grupe/cikël), duke mundësuar një proces mësimor më të fokusuar dhe të përshtatur sipas nevojave individuale. Trajnimet, bazuar në programin SCUL, do të mbahen tri herë në javë në hapësira komunitare në Tiranë dhe Shkodër, duke ofruar një mjedis të aksesueshëm dhe përfshirës. Për të forcuar procesin e të nxënit dhe për të rritur fleksibilitetin, trajnimet do të plotësohen me mësim në distancë përmes platformës digjitale SchoolMe, e cila u mundëson pjesëmarrësve të vazhdojnë zhvillimin e tyre edhe jashtë orareve të trajnimit.

Çdo përfitues do të vlerësohet fillimisht për të përcaktuar nivelin e tij në lexim, matematikë dhe teknologji, dhe më pas do të ndjekë një program të përshtatur sipas nevojave të tij. Paralelisht, do të ofrohen seanca këshillimi psiko-social dhe orientimi në karrierë, të udhëhequra nga psikologë dhe mentorë të trajnuar, për të adresuar barrierat emocionale dhe për të ndihmuar pjesëmarrësit të ndërtojnë një plan real drejt shkollimit ose punësimit.

Kjo qasje synon jo vetëm të përmirësojë punësueshmërinë dhe përfshirjen sociale të përfituesve, por edhe të forcojë kapacitetet e institucioneve vendore dhe qendrore për të mbështetur këto grupe në mënyrë të qëndrueshme dhe të përsëritshme.

Periudha e zbatimit: Shkurt 2025 – Shkurt 2028

Vendndodhja: Tiranë, Fier, Berat, Shkodër, Korçë

Në bashkëpunim me ENGIM

SkillALB është një program gjithëpërfshirës i aftësive për të rinjtë shqiptarë, i cili synon të forcojë arsimin dhe formimin profesional (AFP) përmes inovacionit digjital, shërbimeve të avancuara të orientimit në karrierë dhe mbështetjes për sipërmarrjen e të rinjve.

Ky projekt do të krijojë mundësi të reja për të paktën 1,500 të rinj (15-35 vjeç) që ndjekin shkollat dhe qendrat profesionale, ose që kërkojnë punësim apo financim për vetëpunësim. Gjithashtu, do të përfshijë të paktën 100 mësues, trajnerë dhe punonjës rinorë në trajnime dhe udhëzime për karrierë.

Objektivat kryesore:

Fuqizimi i institucioneve të AFP-së përmes inovacionit dixhital dhe përshtatjes me tregun e punës.
Përmirësimi i shërbimeve të orientimit në karrierë për të rritur efektivitetin e punësimit të të rinjve.
Shtimi i mundësive të trajnimit dhe financimit për të rinjtë që dëshirojnë të krijojnë biznese të reja.

Në bashkëpunim me ENGIM, projekti do të ndihmojë të rinjtë shqiptarë të zhvillojnë aftësitë e tyre dhe të përgatiten më mirë për tregun e punës dhe sipërmarrjen.

Vendndodhja: 14 rajone në Shqipëri, duke përfshirë Berat, Dibër, Durrës, Elbasan, Fier, Gjirokastër, Korçë, Pogradec, Kukës, Lezhë, Shkodër, Tiranë, Vlorë dhe Sarandë.

Projekti Udhëtim drejt Punësimit synon të rrisë punësueshmërinë dhe përgatitjen profesionale të të rinjve në Shqipëri duke ofruar trajnim të specializuar, mbështetje psiko-sociale dhe mundësi integrimi në tregun e punës. Kjo iniciativë është krijuar për të pajisur të rinjtë e papunë, mësuesit dhe profesionistët e shërbimeve sociale me aftësitë e nevojshme për të nxitur zgjidhje të qëndrueshme në punësim.

Objektivat kryesore:

400 të rinj të papunë (15-29 vjeç) do të marrin pjesë në trajnime për punësueshmëri, duke përmirësuar aftësitë e tyre për tregun e punës.
40 instruktorë të QFP dhe mësues të AFP-së do të trajnohen për të përmirësuar cilësinë e arsimit profesional.
20 psikologë dhe punonjës socialë do të trajnohen në mbështetje psiko-sociale, duke siguruar një zhvillim gjithëpërfshirës për të rinjtë.
Një program zhvillimi të aftësive do të përfshijë 500 të rinj adoleshentë, duke i përgatitur ata për tregun e punës.
Do të zhvillohet dhe validohet një kurrikul e re për sistemin e AFP-së dhe integrimin në tregun e punës.
Do të zbatohet një paketë e plotë mbështetjeje psiko-sociale për të ndihmuar të rinjtë në kërkimin e punës.
Projekti do të zbatohet në bashkëpunim me AKPA, Ministrinë e Shëndetësisë dhe Mbrojtjes Sociale, si dhe institucionet lokale të AFP-së, për të siguruar një ndikim afatgjatë.

Duke kapërcyer hendekun midis arsimit dhe punësimit, Udhëtim drejt Punësimit fuqizon të rinjtë shqiptarë me njohuritë, aftësitë dhe besimin e nevojshëm për të ndërtuar një të ardhme të suksesshme.

Investimi tek të rinjtë sot, do të thotë një fuqi punëtore më e mirë nesër.

Financuar nga: EU4Innovation (EU4I), një iniciativë multi-donatore e bashkëfinancuar nga Bashkimi Evropian (BE), Ministria Federale e Bashkëpunimit dhe Zhvillimit Ekonomik (BMZ) dhe SIDA, e zbatuar nga GIZ dhe SIDA.

Periudha e zbatimit: Dhjetor 2024 – Nëntor 2025
Konsorciumi: CCS, Shkolla Profesionale Mihal Shahini (Cërrik), Shkolla Profesionale Gjergj Canco (Tiranë), Universiteti Luarasi (Tiranë).

Ky projekt synon të fuqizojë nxënësit e arsimit dhe formimit profesional (AFP) në Tiranë dhe Cërrik, duke nxitur inovacionin, sipërmarrjen dhe aftësitë digjitale. Përmes një modeli bashkëpunimi midis shkollave profesionale dhe Universitetit Luarasi, kjo nismë do të ofrojë eksperienca praktike që lidhin arsimin me nevojat dhe aplikimet reale të tregut të punës.

Objektivat e projektit:

Angazhimi i 500 nxënësve të AFP në aktivitete të inovacionit digjital.
Krijimi i një banke gjenetike të farërave për të ruajtur 80+ varietete të farërave autoktone shqiptare.
Digjitalizimi i bankës së farërave dhe krijimi i një platforme online të zhvilluar nga nxënësit.
Organizimi i një konkursi sipërmarrësie, duke inkurajuar nxënësit të zhvillojnë ide biznesi të lidhura me farërat autoktone.
Forcimi i bashkëpunimit midis institucioneve të VET dhe Universitetit.
Integrimi i mjeteve digjitale dhe inovacionit në arsimin profesional.
Përmirësimi i metodave të mësimdhënies dhe promovimi i kulturës sipërmarrëse në shkollat profesionale publike.

Ky projekt do të pajisë të rinjtë me aftësitë dhe njohuritë e nevojshme për të kontribuar në zhvillimin e qëndrueshëm ekonomik të Shqipërisë.

Promovimi i grupimeve logjistike ndërrajonale në zonën e Adrionit

Financuar nga: Programi Interreg VI-B IPA ADRION 2021-27

Periudha e Zbatimit: 09/2024 – 09/2027

Aksi prioritar 1: Mbështetja e rajonit të Adriatikut dhe Jonit për të qenë më inteligjent

Objektivi specifik 1.1: Forcimi i kapaciteteve të inovacionit në Rajonin Adriatik dhe Jon

Zona ADRION përballet me kufizime të konsiderueshme në sistemet dhe shërbimet logjistike, duke penguar shkëmbimin efikas të mallrave brenda rajonit. Mungesa e lidhjeve të “kilometrave të fundit” ndërmjet porteve, terminaleve intermodale dhe qendrave të logjistikës ndërpret kapacitetin e përgjithshëm të zinxhirëve logjistik lokalë. Për më tepër, grupet e rajonit janë të pazhvilluar, pasi qendrat kërkimore, autoritetet publike dhe kompanitë private nuk arrijnë të shfrytëzojnë plotësisht përfitimet e bashkëpunimit.

Objektivat e projektit dhe ndryshimet e pritshme

Projekti ynë synon të adresojë këto sfida duke rritur qëndrueshmërinë, inovacionin dhe ndërkombëtarizimin e sektorit logjistik në zonën ADRION. Qëllimi kryesor është krijimi i një grupi makro-rajonal inteligjent dhe të qëndrueshëm bazuar në modelin 4helix. Duke vepruar në këtë mënyrë, ne presim të modernizojmë sektorin logjistik, të nxisim bashkëpunimin midis palëve kryesore të interesuara dhe të promovojmë praktika miqësore me mjedisin.

Objektivat përfshijnë forcimin e lidhjeve ndërmjet NVM-ve logjistike, akademisë dhe autoriteteve publike, promovimin e transferimit të teknologjisë, mbështetjen e ndërkombëtarizimit, prezantimin e shërbimeve miqësore me mjedisin dhe ndërtimin e kapaciteteve për të krijuar grupime të zgjuara dhe të qëndrueshme.

Fondi: 1.712.226,00 €

Mbështetja nga INTERREG: 1.455.392,10 €

Partnerët:

• Dhoma e tregtisë së Prevezës/ Euricon, Greqi
• Universiteti Aristoteli i Selanikut, Greqi
• Aeroportet e Puglia SpA, Itali
• Konfederata Kombëtare e Artizanatit dhe Shoqata e Ndërmarrjeve të Vogla dhe të Mesme Provinca Bari, Itali;
• Instituti për Zhvillim të Qëndrueshëm
• Shoqata Sllovene Logjistike, Slloveni
• Dhoma e Tregtisë së Jashtme të Bosnje dhe Hercegovinës
• Universiteti i Mostarit, Bosnja dhe Hercegovina;
• Qendra për Aftësi Konkurruese, Shqipëri
• Ministria e Bujqësisë dhe Zhvillimit Rural, Shqipëria;
• Dhoma e Tregtisë dhe Industrisë, Serbi.

Rrjetet sociale të projektit:

Faqja web e projektit: ipa-adrion

Broshura:

Lidhur me këtë:

Periudha: 07/2022 – 07/2024

Financuesi: UNICEF Albania

Në një hark kohor prej dy vitesh, projekti ynë ka bërë hapa të rëndësishëm në angazhimin e të rinjve dhe promovimin e Arsimit dhe Formimit Profesional (AFP) në Shqipëri. Grupet e synuara ishin dy, më konkretisht: nxënësit e klasave të 9-ta me qëllimin për t’i prezantuar ata me AFP-në dhe nxënësit e klasave të 10-a me performancë të ulët në AFP për të lehtësuar integrimin e tyre në AFP dhe zvogëluar shkallën e braktisjes.

“Kampet e aftësive”

Në korrik 2022, CCS ngriti kampet e “Skills Boost” në rrethet Tiranë dhe Korçë. Me pjesëmarrjen e mbi 150 të rinjve që kishin përfunduar klasën e 9-të, këto kampe shërbyen si inkubatorë të krijimtarisë dhe zhvillimit të aftësive, duke ofruar përvoja praktike në lëndët e AFP-së si gatimi dhe qepja, sesionet e orientimit në karrierë dhe mundësitë për rritje personale përmes aktiviteteve të tilla si komunikimi përmes artit, turneve sportive, seminareve të IT dhe shumë më tepër. Të ftuarit e veçantë, si këngëtarja Marsela Çibukaj, shërbyen si frymëzim për sesionet e orientimit në karrierë, duke ndarë me ta sfidat, mësimet dhe aftësitë e nevojshme për një karrierë të suksesshme.

“Ditët e AFP-së”

Gjatë vitit të dytë, fokusi i projektit u zhvendos në rreth 250 nxënës të klasave të 9-ta të regjistruar në shkollat e arsimit të detyrueshëm në rrethet pjesë të projektit. Nëpërmjet “Ditëve të AFP-së”, studentët vizituan ambientet e shkollave profesionale, u angazhuan në mini-kurse dhe ndërvepruan me mësues dhe ish-nxënës të suksesshëm të këtyre shkollave që tashmë kanë bizneset e tyre. Ky ekspozim gjithëpërfshirës ndaj arsimit AFP ka nxitur shumë studentë të konsiderojnë regjistrimin, duke kontribuar kështu në zhvillimin e tyre akademik dhe personal. Ditët e AFP-së janë përqafuar me entuziazëm si nga shkollat e 9-vjeçare ashtu dhe ato profesionale, duke përfaqësuar një model që duhet ndjekur dhe shumëfishuar në një shkallë më të gjerë.

“Fundjavat e Aftësive“

Në zemër të këtij projekti janë “Fundjavat Aftësive”, që kanë pasur ndikimin dhe jehonën më të madhe në shkollat e AFP-së. I zbatuar në 19 shkolla në 7 rrethe të Shqipërisë, ky komponent i projektit impakton rreth 1000 nxënës të klasave të 10-ta në këto rrethe. Në një seri aktivitetesh plot ngjyra dhe muzikë të kryera si në atraksionet e shumta turistike të Shqipërisë, ashtu edhe në shkolla, nxënësit u përfshinë në veprimtari që ndërthurnin lëndë si gjuhë dhe komunikim, matematikë dhe TIK me diskutime për orientimin e karrierës, grupe në fokus për aftësitë e buta, mbrojtja mjedisore dhe puna punë vullnetare, lëvizshmëria e gjelbër si dita e biçikletave, të cilat i shtynë studentët drejt rritjes personale, krijimit të një lidhjeje më të fortë me bashkëmoshatarët dhe mësuesit, dhe rritjes dëshirës për të ndjekur shkollën dhe për tu bërë pjesë integrale e saj.

Impakti përtej shkollave

Ndikimi i projektit shtrihet përtej kufijve të mureve të shkollave pjesëmarrëse, duke nxitur bashkëpunimin midis mësuesve, nxënësve, prindërve, bizneseve, institucioneve komunale dhe arsimore dhe më gjerë. Dinamika e përmirësuar e grupit dhe rritja e aftësive të komunikimit midis studentëve dhe mësuesve janë vetëm disa nga rezultatet e shumta pozitive të qasjes së aplikuar nga projekti. Së bashku, ne shpresojmë të kemi ofruar një model që shkollat mund ta përsërisin për një brez më të integruar dhe më të fuqizuar të të rinjve në Shqipëri.

Përfituesit:

• +250 nxënës të klasës së 9-të kanë marrë pjesë në Ditët e AFP-së që synojnë njohjen dhe promovimin e arsimit të AFP-së.
• Janë organizuar dy ‘Kampe për rritjen e aftësive’ dhe Korçë dhe Tiranë me pjesëmarrjen e rreth 150 nxënësve të klasave të 9-ta.
• +330 Aktivitete të “Fundjavave të Aftësive‘ të organizuara deri më sot brenda mjediseve të shkollës, bizneseve, vendeve kulturore dhe historike, muzeumeve, parqeve natyrore, natyrës etj.
• +1400 nxënës të klasave të 10-a në AFP kanë marrë pjesë të paktën një herë në Fundjavat e Aftësive, deri më sot.
• +40 mësues të AFP-së të trajnuar për zbatimin e programit dhe identifikimin dhe trajtimin e sjelljeve të lidhura me traumën tek nxënësit.
• +40 mësues të Arsimit të Mesëm dhe AFP të trajnuar për zbatimin e programit për Ditët e AFP-së
• 21 shkolla të AFP pjesëmarrëse të shpërndara në 7 rrethe të Shqipërisë
• 6 shkolla të arsimit të Detyruar nga 3 rrethe të Shqipërisë
• +15 ekspertë te angazhuar për arsimin, orientimin në karrierë, mjedisin, artet, psikologjinë, sportin dhe lëvizshmërinë e gjelbër.

Dokumentet e projektit:

• Programi me module për zhvillimin e aftësive bazë të studentëve të AFP-së.
• Udhëzime për testimin e përvojave praktike të të nxënit të nxënësve të klasave të 9-a të arsimit të detyruar në shkollat e AFP-së.

Arritjet:

• Në vitin e parë të zbatimit të projektit, rreth 90% e nxënësve kanë pasur ndryshime pozitive në aspektin psiko-emocional: janë më miqësorë, më komunikues me mësuesit dhe bashkëmoshatarët.
• Gjithashtu, 86% e nxënësve kanë pasur ndryshime pozitive në ndjekjen e shkollës. Asnjë nga nxënësit e përfshirë në projekt nuk e ka lënë shkollën.
• 79% e nxënësve kanë përmirësuar aftësitë bazë digjitale në përdorimin e Microsoft Word, PowerPoint, përdorimin e kompjuterëve për mbledhjen dhe përpunimin e informacionit etj.
• 75% e nxënësve kanë përmirësuar aftësitë bazë të komunikimit nëpërmjet prezantimit të vetes, komunikimit ndërpersonal, grafikës, PowerPoint-it, fotove dhe videove etj.